Агууехэ уранзохёолшо,драматург, киносценарист Даширабдан Батожабайн түрэһөөр
95 жэлэй ойдо зорюулагдаһан "Минии уг гарбал"-"История моего рода" Интернет-конкурсдо
Эрхим зохёол номинаци.
Цыденжапов Алдар, Яруунын аймагай Нарһатын дунда һургуулиин 5-дахи класса һурагша.
Минии элинсэг үбгэн баабай Цыденжапов Доржи Чимитович 1935 оной декабриин 21-дэ Яруунын аймагай Догно нютагта түрэһэн. Шэмэдэй Цыденжап (1901) ба Бабуугай Шойжид (1900) хоёрой юһэн үхибүүдэй наймадахинь болоно. Догнынгоо эхин һургуулиин һүүлээр , Нарһатада түрэлдѳѳ байжа, 7 класс дүүргээд, 16 наһатайдаа Загарайн аймагай Элхиин механик мэргэжэлэй техническэ училищидэ һураһан юм. Училищиин һүүлээр аймагай РТС-тэ , түрэл «Улаан-Туяа» колхоздоо трактористаар, жолоошоноор сэрэгэй албанда ошотороо хүдэлѳѳ.
1957 онһоо 1960 он болотор cэрэгэй алба дүүргээд, түрэл «Рассвет» колхоздоо, хожомынь Нарһатын совхоздо 1995 ондо наһанайнгаа амаралтада гаратараа жолоошоноор таһалгаряагүй хүдэлһэн. Амаралтада гараадшье миин һуугаагүй, үшѳѳ олон жэлдэ жолоошоноор хүдэлѳѳ. Мүнѳѳ 82-дохи үбэлѳѳ угтахаяа байбашье, сарюун хүнгэн зандаа, үмсынгѳѳ «агтые» жолоодоһоор, аша гушанартаа туһатайхан, хоёртой Ким зээнсэрээ харалсажа хамһалсажа һуудаг.
1955 ондо хүдѳѳ ажахын медаляар «За освоение целины» шагнагдаһан, сэнтэй бэлэгүүдтэ, баярай бэшэгүүдтэ олон удаа хүртэһэн. «Победитель социалистического труда», «Победитель коммунистического труда» болоһон байна. Эрхимээр ажаллаһанайнгаа түлѳѳ профсоюзна путёвкоор Москва, курорт «Горячинск» ошожо амараа. 1956 ондо Дашиева Норжима Лодоевнатай хуби заяагаа нэгэдүүлжэ, гурбан үри хүүгэдээ гарынь ганзагада, хүлынь дүрѳѳдэ хүргэһэн габьяатай. 1998 ондо президентын зарлигаар «Заслуженный работник агропромышленного комплекса» - гэжэ медаляар шагнагдаһан.
Элинсэг хүгшэн эжы Дашиева Норжима Лодоевна 1938 оной февралиин 12 адуушан Лодоев Даша Базарович (1902) ба Дамдинова Дарижап Аригуновна (1907) хоёрой гэр бүлэдэ түрэһэн. 6 класс дүүргээд, аба эжы хоёртоёо буруудые хараһан ,учетчигооршье фермэ дээрэ, һаалишанаар наһанайнгаа амаралтада гаратараа түрэл Улаан-Туяадаа хүдэлѳѳ. Олон тоото бэлэг cэлэг,амаршалгануудта хүртэһэн, амархаяа курорт ошоһон байха. «Ветеран труда» нэрэ солотой. 2015 ондо «Дайнай үеын үхибүүд» гэһэн үнэмшэлгэ абаад, олон тоото ашанар гушанараа, зээнэр зээнсэрнүүдээ харалсажа байтараа, үбшэн хүрэжэ, алтан дэлхэйтэеэ хахасаа.
