Агын тойрогой Агинское тосхондо «Бальжин хатан» гэhэн эхэнэрнүүдэй буряад дүримөөр hур харбалгаар мүрысөөн энэ оной ноябриин 18-да болобо.
Номо hаадагаа агсаhан үндэhэн буряад хубсаhатай эхэнэр hуршад hүр жабхалантайгаар алхалалдан зураахайгаа гороолоод, мүрысөөн эхилбэ.
Мэргэн гартай, хёрхо нюдэтэй hур харбагшад баатарлиг шэнжэтэйгээр, нюдэндэ уринаар харагдажа байгаа бэлэй!
Ана-мана харбалдаад, 50 hур харбагшад сооhоо илгаржа ОюнаЧимитдоржиева (Ушарбай) абарга мэргэн болобо. Татьяна Людофа (Забайкальск) хоёрдохи hуури, Аглаг Жаргалова (Могойто) гурбадахи hуури, Дарижаб Баясхаланова (Агинское) дүрбэдэхи hуури эзэлбэд. Ханда Дугарова таба дахин ласти тудаад, «Ласти мэргэн» гэжэ соло дуудуулба.
Командаараа Могойто hуурин (92 оноо) нэгэдэхи, Шэтэ хото (92 оноо) хоёрдохи, Ушарбай нютаг (89 оноо) гурбадахи hуурида шалгаржа гарабад.
Ушарбай тоонто нютагайм Оюна Чимитдоржиева басаган абарга мэргэн болоходонь,тон ехээр баярлаад, хэнэй басаган гээшэб гэжэ hурагшалбаб. Мэдэн гэhээм, Чимитдоржо Ванжиловай зээ басаган, Чимитдоржо Самбуевай аша басаган байжа байбал.
Оюнын мүндэлхэдэ, абань өөрөө Бата Самбуев обогтой аад, нагаса абынь, үбгэн абынь Чимитдоржо нэрые обог болгожо басагандаа үгэhэн байгаа юм. Үшөө юуниинь hонин бэ гэхэдэ, Оюнын үбгэн аба онгор хуасай омогой Самбуев Чимитдоржо буряад эбэр номоор харбадаг, зунай нааданда ходо илалта туйладаг байhан байна. Баатаржаан харгана угай нагаса абань Ванжилов Чимитдоржо (тренер Цежаб Эрдынеев) 1995 ондо пара олимпиин hур харбалгаар Россиин чемпионадта хоердохи hуури эзэлhэн байна. Бата Самбуев абань Оюные харбажа hургаа, Баирма Чимитдоржиевна эжынь баhа харбадаг. Янжима, Норжимо абга эгэшэнэрынь харбадаг.Энэл мүрысөөндэ Янжима Самбуева өөрынгөө наhанай бүлэг соо гурбадахи hуурида гараа. Гүлмэр залуухан Оюна арбан зургаан наhатай, Ушарбайн hургуулиин 11-хи класста hурадаг.
Ушарбайн hур харбагшадые Даша Баясхаланов буряад дүримөөр харбалгада hургадаг юм.
Тэрэ Монгол орондо hур харбалгын мүрысөөндэ ошоод ерэхэдээ, урданай буряадуудай ёhо заншал тэндэхи буряадуудhаа мэдэхэ болоод ерээ hэн.
-Өөрынгөө сэдьхэжэ байhанаа шэбшэжэ, зураахайнгаа дүрбэн углууда номоороо хүртэхэ, зүүн гартаа баряатай hуршануудаа хажуудаа табяад, баруун гартаа баряатай номоёо табяад, малгайгаа абажа, бүлэнүүдые шахажа, гар хүрэхэ, зураахайдаа мүргөөд, малгайгаа hөөргэнь үмдөөд, hурша номоо баряад, гэдэргээ алхаха, зураахайдаа нюргаа харуулжа болохогүй, номынгоо хүбшэргэй гурба дахин татаха. Энэ ёhо гурим бидэ мэдэхэгүй байгаабди, мүнөө hуража байнабди, -гээд Даша Баясхаланов хөөрэбэ.
Ушарбай нютагай мэргэн харбагшад элинсэг хулинсагайнгаа ёhо журам, зан заншал hэргээжэ, ехэ бэлэдхэлэй, оролдолгын ашаар илалта туйлаба. Эдэ үдэрнүүдтэ hуршад Монголой Булган аймагта болохо «Алтаргана-2024» нааданда бэлдэжэ эхилбэ.
