“УУГАН ХҮБҮҮН” АГАДА
Агын тойрогой түб Агинское хотодо Соёлой Байшан соо Х.Намсараевай нэрэмжэтэ Буряад драмын театрай артистнууд Александр Вампиловай «Ууган хүбүүн” зүжэг апрелиин 19-дэ табиба. Зүжэг харахаяа, һургуулиин наһанай үхибүүд олоороо ерэбэ. Үхибүүдэй дунда һуугаад, эдэнэр буряад хэлээр зүжэг ямараар угтагша ааб, ойлгожо абаха гээшэ гү гэжэ һанаата болооб. Тэдэнэр шэб шэмээгүй, энеэлдэхэ газартань энеэлдэжэ байгаад, анхаралтай хараад, зүжэгэй түгэсхэлдэ альгаа ташажа, нэбшэгэрээрээ зогсоходонь би ехэ баярлааб. Бүхы дэлхэй дүүрэн элитэ мэдээжэ болоһон талаан бэлигтэй Александр Вампиловай уран бүтээл үхибүүдэй зүрхые хүлгүүлээ гээшэ ха.
“Ууган хүбүүн” зүжэгэй эхилхэдэ, һүүдэр зураг дээрэ уран зохёолшын онгосоор һэлюурдэн байха харагдаад, наада талада байһан ендэр хэлбэлзээд, зүжэгшэд иишэ тиишээ унан алдажа байтараа, тогтожо шадана.Ажабайдалай долгиндо шэдүүлһэн, тэнсүүриень оложо ядаһан, худал үгэ хэлээд, тэрээндээ зобожо, эльгэ зүрхөө химэлжэ, архи уудаг, ама халамгай Сарафановай дүрые Буряад Уласай габьяата артист наадажа, үнэншэмэ бэрхээр харуулжа шадаа. Удхалан, уудалан ямар бэ даа онсо ондоохон оныень олоод, ямар бэ даа урлалай түлхюур тайлаад, бидэ Сарафановые хайрлаха, үмөөрэхэ сэдьхэлдэ абтажа, сэдьхэлэй уя нэбтэржэ, дэбтэжэ досоомнай нимгэн болоно. Бэлигтэ Дамбаевай талаан бэлигэй хүсэн, дүршэл шадабариинь үрэ дүн эндэл тобойн гаража ерэнэ.
Буряад Уласай габьяата артист Бусыгин, Сильва хоёрой дүрэ наадаһан зүжэгшэд түрүүшэгээр хэниинь хэн бэ илгаруулхаар бэшэ. Худалаар хэлэхэдэ хамаагүй, һанаа амар. Бусыгиниие наадагша артист эсэгын энхэрэл үзөөгүй, аба гэжэ хэндэш хандажа үзөөгүй ябаад Сарафановай “хүбүүмни, хүбүүмни” гэжэ хандахада юм гү, али Нинын дуранһаа гү, сагааржа эхилнэ, досоонь юун бэ даа гэрэлтэжэ эхилнэ, һүүлдэ үнэниие хэлэхэдээ, һанааниинь тэгшэрнэ, шарайнь һаруул сэбэр болоно. Жэгтэй нюусгайгаар, гүнзэгыгөөр артист наадана наадана.
Залуухан артист Бата Шойнжонов Васенькые наадана. Эхын энхэрэл үзөөгүй, 17-ой хүбүүнэй абари зан, аяг ааша, инаг дурлал харуулжа шадаа. Батые түрүүшынхеэ 14 жэлэй саада тээ Яруунын аймагай Эгэтын-Адаг нютагта үльгэршэн Рэгзэн Эрдынеевэй түрэһөөр 100 жэлэй ойн баярай үедэ үльгэр түүрэхыень соносоод, “Буряад үнэн” һониндоо бэлигтэй хүбүүн ургажа байна гэжэ бэшээ, гэрэл зурагыень табяа һэмби. Һүүлдэ Москвада һурана гэжэ дуулаад, баярлаа бэлэйб. Буряад театрай артист болоод, хадуугдама хурсаар наадахыень хараад, угаа ехээр баярлабаб.
Зүжэгэй эгээн түгэсхэлдэ хэлбэлзэжэ байһан ендэр Сарафановай ара талада бүхэ түшэлгэ мэтэ хана болоод бодошоно. Бүхы юумэн зүб мүрөөр болоо, үнэн юумэн элирээ, амидарал тэгшэрээ, ажабайдал амгалан тайбан үргэлжэлнэ гэжэ ойлгооб.
Театр хамта олоной ажал. Зүжэгтэ наадагшад нэгэ амин болоод, гайхамшаг гоёор наадаа. Зүжэг бүтээһэн бүгэдэ зониие магтанаб, бултанда баяр хүргэнэб.
Бидэнэрэй ухаан бодолые һэргээдэг, сэдьхэлые хүлгүүлдэг, эльгэ зүрхыемнай уяруулдаг түрэл Буряад театртаа баяр хүргэнэбди!
