Багша, хүмүүжүүлэгшэ, Буряадай уран зохёолшодой холбооной гэшүүн, Монголой Ирагуу найрагай Академиин хүндэтэ гэшүүн, олон номуудай автор, ирагуу найрагша, уран зохёолшо, оршуулагша гайхамшаг абьяас бэлигтэй Сэндэмэ Дашиевна Бабуева уран зохёолшын асари ехэ ажал хэжэ ябана гээшэ. Зохёоhон бүтээлнүүдыень уншажа маша ехэ баярладагби.
Ирагуу найрагша Сэндэмэ Бабуева зохёоhон шүлэгүүд соогоо оорынгоо үзэhэн, хараhаниие, hанаата болоhон бодолнуудаа, зүрхэ сэдьхэлээ шэмшэрhэнээ,уяран баярлаhанаа, уйдан гашуудаhанаа уран, баян хэлээр бэшэдэг байна. Шүлэгүүдынь тодо hонор, үхибүүдэй сээжэлдэхэдэ ульгам, уншагшын сэдьхэлэй хүбшэргэй дайража, бодолго түрүүлдэг. Эхэ орон тухай, буряад хэлэн тухай, эхэ ороншо патриот байха тухай, инаг дуран, эб нүхэсэл, байгаали тухай шүлэгүүдынь баян үгэтэй, уран hайханаар боомэйлэн мүлигдэнхэй, поэзиин дүрим, гурим сахигдаhан байдаг. «Алтарганын» уран шүлэгэй конкурсдо оло дахин илалта туйлаhан, Сэндэмэ Дашиевнагай зохёоhон үльгэр түүрээгээд үхибүүд Алтарганын үльгэршэдэй конкурсдо илалта туйладаг гээшэл. Буряад арадай түүхэ тухай, түүхэтэ хүнүүд Балжин хатан, Бабжа Барас баатар тухай магтаал түүрээлгэнь тусгаар онсо ондоохон, hүр hүлдэ бадараама удха түгэлдэр юм!
Монголой алдарта уран зохёолшо Гомбожабын Мэнд-Оёогой «Гэгээнтэн», Лодонгийн Тудэвэй «Оройгүй сүмэ» романуудые буряад хэлэндэ оршуулжа, ямар асари ехэ ажал хээ гээшэб! Монгол hайхан ороной уран зохёолтой бидэнээ танилсуулжа, сэгнэшэгүй ехэ ажал хэнэт, ямар ехээр бидэнээ баярлуулна, баясуулна гээшэбтэ!
Энэ агууехэ ажал нэгэ хүн Сэндэма Дашиевна Бабуева хэжэ шадаа шуу гэжэ гайхамаар!
Уран зохёол, уран шүлэг зохёохо ажалаараа жаргалтай, сэдьхэл сээжэ сэмсэгэр, сэсэ мэргэн ухаантнай сонор зандаа, ирагуу найрагай тунгалаг булаг бурьялжа, монгол туургата арадтаа шэнэ hонин бүтээлнүүдые бэлэглэжэ, сарюун сэбэр, омог дорюун ажаhуухыетнай Тандаа хүсэнэб!
